الموجز
أكدت الإعلامية عزة مصطفى أن مهرجان القلعة العام الماضي حقق نجاحًا غير مسبوق؛ بسبب حضور كل مستويات المواطنين للحفلات، لافتة إلى أن سعر التذكرة بلغ 20 جنيهًا، وشجع الأسرة المصرية على الذهاب للاستمتاع بالغناء والموسيقى.
وخلال تقديم برنامجها "صالة التحرير" المذاع عبر فضائية "صدى البلد" مساء الإثنين، أشارت عزة مصطفى إلى استثمار نجاح مهرجان القلعة العام الماضي، مناشدة إقامته في كل المحافظات بنفس أسعار العام الماضي دون زيادة.
ولفتت الإعلامية إلى أن المحافظات محرومة من الحفلات، مضيفة: "لو متفقون مبدئيًا أن الناس ترجع من حالة الحفلات مبسوطة يبقى ده مؤشر كويس وتعديل المزاج العام، فكرة إنك تقدر تخلي الناس تنام مبسوطة ما نعمل ده، بدل ما الناس بتنام وتصحى على ارتفاع أسعار، طبيعي لما الواحد يعيش الحياة دي يرجع ينام يحلم بكوابيس ويصحى يبقى يومه مقفول".
وأعربت "مصطفى" عن تقديرها لكل الجهود المبذولة من الحكومة والدولة؛ لضبط الأسعار، داعية إلى ضبط المزاج العام بالتوازي مع تلك الجهود، وفقا لصحيفة "الشروق".
وتابعت: "لما أنام على خناقة أسعار متوقع الحوار جوا البيت عامل إزاي؟ أنا لا رومانسية ولا أتحدث من كوكب تاني ولا طالبة مستحيل، لكنه واقع كل الناس عايشينه، خلينا نشتغل على المزاج العام للناس ونسعدهم شوية، بدل كل يوم الكلام عن الأسعار والمصاريف".
وأكملت العلامية: "المزاج تعب محتاج يتغير ويتعدل ونهتم بيه ونشتغل عليه مش هيكلفنا كتير، حتى لو كلفنا كتير مردوده أفضل"، مقترحة إقامة حفلات داخل مراكز الشباب خلال فترة الصيف.
وتوجهت عزة مصطفى برسالة لمن يهمه الأمر: "اسعدوا الناس يسعدكم ربنا، نفسي في الصيف فكرة البلاجات اللي ببلاش، خلي الناس تقدر تروح وتصيف ومتتكلفش كفاية اللي هي فين، مش طول الوقت نفس الطريقة نشتغل بيها، في الأوقات الاستثنائية لازم نكسر ونتخذ إجراءات استثنائية، إيه المشكلة يبقى في مصيف ببلاش للناس، كل الناس من حقها تصيف وميدفعوش حاجة."
0 تعليق