عمرو أديب لمنتقدي بيع الجنسية المصرية: اسألوهم كده الجنسية التركية بتتباع بكام؟!

0 تعليق ارسل طباعة تبليغ حذف

قال الإعلامي عمرو أديب، إنه لا يمانع بيع جواز السفر المصري طالما أن الأمر يرتبط بضوابط معينة، موضحا أن أكثر من 30 دولة تبيع جواز السفر منها دول عظيمة وكبيرة.

وأضاف خلال برنامجه «الحكاية» على قناة «mbc مصر»، مساء الأحد، أن الدولة خففت ضوابط بيع الجنسية، متابعا: «الناس اللي عاملة مناحة.. هو فيه إيه.. أنا عارف إن مصر دولة عظيمة وحواز السفر بتاعها عظيم.. لكن أرجوكم متزودهاش.. جواز السفر المصري فرصة لناس كتير حياتها في مصر ومهتمة يكون لها وجود شرعي في مصر».

وأشار أديب، إلى أن له أصدقاء كثيرين أخذوا الجنسية المصرية بطرق مختلفة، دون أن يوضح ماهية هذه الطرق.

كما وجه رسالة للمتخوفين على التركيبة السكانية في البلاد في أعقاب هذا القرار، قائلا: «مصر تعدادها 110 ملايين.. إنتو خايفين على إيه.. هو كام واحد هيشتري جواز السفر.. حتى لو 100 ألف واحد.. خايفين على إيه.. هو إحنا في جزيرة.. دي مصر».

وردّ أيضا على مزاعم أثيرت بأن الدولة ستبيع الجنسية للإسرائيليين قائلا: «فيه ناس قالت الإسرائيليين هيجوا يشتروا جواز السفر ويحتلونا.. هو الإسرائيلي عاوز يحتل الشقة.. أنا مش بقول إني موافق يشتري جواز السفر لكن ليه الهواجس.. كانوا احتلونا بالحرب مش بالشقة ".

وتابع: «إسرائيليين مين اللي ياخدوا الجنسية.. إنتو مش عارفين إنتو فين ومصر دي إيه والمسؤول المصري عامل إزاي.. مهما كان في خلاف على أداء المسؤول لكنه شخص وطني».

واستكمل: «بلاش أفورة.. العالم كله بيعمل كده.. هو فيه إيه.. هو إحنا أحسن من إسبانيا ولا كندا ولا البرتغال ولا حتى تركيا»، وخاطب المصريين بالقول: «الناس اللي عمالة تسخنكم في موضوع بيع الجنسية.. اسألوهم كده الجنسية التركية بتتباع بكام».

وجدد التأكيد على الأمر يتم وفقا العديد من الضوابط، قائلا: «فيه ضوابط في الموضوع وفيه ورق كتير هيتقدم.. مش أي حد كده عاوز الجنسية ياخدها».

0 تعليق